لقاء عمرو اديب ونجيب ساويرس مكتوبا

طبعا احنا فوق مقدمين الحلقة في شكل مقاطع فيديو بس لو علشان الناس اللي النت عندهم بطيء شوية دا نص الحوار مكتوبا
كان السؤال الأول عن عدم تشابه عمرو مع أشقائه عماد وعادل ..
قال عمرو أن كل الناس كانت دائما تقول لى زمان إنت مش زى عماد خالص ، وكان ده بيفرحنى لأنه أحسن مايتقاللى إنت بتقلد عماد .

** إنت دمك خفيف وعادل طيب وهليهلى وعماد شوية جاد ...إنت راضى عن نجاحك ؟

- الحمد لله راضى عن حب الناس اللى هو أكبر نجاح ، فكرة إنك محبوب أفضل من فكرة إنك الأغنى بعد 12 سنة ، منهم 3 الى 4 سنوات الناس كارهانى ، دلوقتى مافيش حد بيكرهنى غير 3 أو 4 أنا عارفهم بالاسم منهم واحد صاحبك ...

** هل شعرت بالخوف من اللى انت بتقوله فى وقت من الاوقات ؟
- كتير باشعر بالخوف طبعا ، وأروح ألاقى نفسى ندمان على حاجة عملتها أو كلام قلته ،وأحس بالتأنيب وفى شغلتنا دى المذيعين عمرهم قصير والشغل بتاعنا واقف على فرد واحد ، فى مواجهة مؤسسات وهيئات وأحزاب و...
- فى النهاية عمرك مرتبط بعمر الهوا ، تمشى وبعد اسبوعين يقولك آه كان فيه مذيع زمان مش فاكر اسمه ، مش ده اللى كان فى القاهرة اليوم ...أنا ممكن أقوللك أسماء مذيعين مش هتصدق هم فين والمشكلة أن يكون لك خلاف مع جهه لا تتناقش ، وفيه ناس مفيش معاهم حوار ..
** كذا حد عمل معاك مقابلة وطلع بعد كده على السجن .....أذكر إنهم 2 ؟
- هم أكتر من كده ..

** وأكتر لقاء فرحت بيه ؟

- اللقاء اللى أنا عملته مع حسام أبو الفتوح فى السجن ، كان أول مرة يتكلم بعد حبسه ، وقابلته فى مبنى المدعى العام الاشتراكى ...
** فات 7 سنين ونفسنا يخرج ..

- الناس كلها كلمتنى بعد الحلقة ، وقالتلى الراجل ده ابن ناس ، وفيه بلاد كتير لا تضع عقوبة الحبس فى القضايا التجارية ....
رغم ان فيه ناس عملت دلوقتى أكتر من اللى عمله ...
** بتعمل إيه مع الاهلاوية ؟

- الأهلاوية فى مصر بيفرحوا فى هزيمة الزمالك شماتة فى عمرو أديب أكتر من فرحهم بفوز الأهلى ...
إحنا بقالنا مده كويسين والزمالك بيكسب ولما ده بيحصل الزملكاوية بيبانوا .
والسنةالاهلى مش هياخد حاجة والزمالك قادم .

** هل تعرضت للإيذاء بسبب عملك ؟
- مرة رموا على عربيتى مياة نار ، والضابط لما جه يسألنى عندك حد تتهمه ، قلتله إنت عندك وقت يوم من أول النهار أقولهملك ؟ دول كتيييير ..

** إحنا فى عصر حرية ولا فوضى ؟
- إحنا فى عصر حرية


** عندى حساسية ضد ظلم الاعلام ، ألم تظلم أحد ؟ وهل تعتذر ؟

- أيوه طبعاً وده مش عيب ، ممكن تيجى معلومة سريعة وأكتشف بعد كده إنها غلط ...

** أحياناً أشعر أن الاعلامى داخل والحكم فى دماغه رغم إن القاضى مش بيعمل كده ، وفى حلقه عملت حوار مع حد وخليته إبليس ولبسته كل الجرايم وبعد كده طلع براءة .....

- ده موضوع ممكن نتكلم فيه بصراحة بس بعد الحلقة !!

** الاعلام أصبح هو صناعة الخبرالسئ ..
- أنا آسف إن إنتوا اللى بتدونا الاخبار الوحشة ، مش بتعملوا حاجه كويسة علشان نتكلم عنها ... النهارده العبارة غرقت وانت عمرو أديب هتقول إيه ؟ !!
** مش هاصدر أحكام ، لكن هابحث عن المجرم ومش لازم نحرق صاحب الشركة زى مانتوا قلتوا ، أحياناً تحدث غوغائية فى الموقف ، هو احنا اللى هنحاكمه ، مش جايز أن الكابتن هو المسئول عن اللى حصل ، لو عندى اتوبيسات للنقل السياحى وسواق عمل حادثة هتحملونى المسئولية ؟

- لو عربيتك سليمة ماعنديش مشكلة ، لكن لو العربية فراملها بايظة لازم أدينك ...


** إنت ناوى تكمل فى التمثيل ؟
- أنا مثلت فقط دورى ، حتى انهم جابوا حوار رفضت أقوله ، وارتجلت ويسرا ورياض الخولى دخلوا فى الارتجال معايا ، وانا ممكن أتكلم 4 ساعات لكن مش باعرف أحفظ ...

** دمك خفيف فى البرنامج ...
- خفة الدم لها علاقة ب3 حاجات السياسة والدين والجنس ، الدين مانقدرش نقرب منه إنما السياسة والجنس لأ ...

** بتشوف البرامج اللى زيك ؟

- أنا باشوف كل زملائى إللى قبلى ، فيه ميزة إنى بابدأ متأخر فيبقى سهل وانا باعمل الماكياج اتفرج على البرامج اللى قبلى كويس ..

** يقال أن قناة الجزيرة لا تنتقد قطر فماذا عن الأوربت هل هى الاخرى لا تنتقد السعودية ؟
- أنا ماعرفشى حاجة عن السعودية أصلاً أنا باعمل برنامج إسمه القاهرة اليوم ، لكن غطينا موضوعات كان فيها أطراف سعودية وبمنتهى الحرية ، منها حادثة الكلب ...
وصاحب المحطة بيكلمنا مرتين تلاتة ، مرة فى العيد الكبير والعيدالصغير ، لكن فيه أصحاب محطات يخشوا على المذيع ،وعلى الهوا !! ... حصلت فى محطتين تلاتة ، دخل قالله ده مش رأى المحطة ، إنت بتتكلم عن رأيك ولا إيه ...دكان أصلها

** إيه رأيك فى مستقبل البلد ... إنت متفائل ولا ...
- المستقبل زى الفل ، طول مافيه ناس زيك ... وفى بلدنا الهرم هو كل حاجة ، معدل النمو بتاعنا بينزل على القمة زى المطر ، بيوصل لتحت عند القاعدة مجرد رذاذ ، احنا مشكلتنا فى توزيع النمو مش فى النمو ...


** توزيع النمو ده مش بياخد وقت ؟ تركيا خدت حوالى 10 سنين واحنا لم نبدأ إلا من 4 سنين ..

- إنت جاى النهاردة تقوللى وقت ؟. تانى هنستنى 10 سنين كمان ؟
** لأ حوالى 5 سنين بس وأنا متفائل ..
الحكومة بدأت تكش من كتر الصخب بتاعكم ، أنا مش شايف انهم ماشيين بنفس الاداء اللى بدأوا بيه